2001 - MÁIRE NÍ CHATHASAIGH

Roghnaíodh Máire Ní Chathasaigh mar cheoltóir na bliana ag Gradam Ceoil TG4 2001 - "as ceannródaíocht agus feabhas a cuid ceoil agus as an fhorbairt shuntasach atá déanta aici ar cheol cláirsí agus as an tionchar fíor-dhearfa atá imeartha aici ar ghlúin óg cláirseoirí".

Is i nDroichead na Bandan, Co. Chorcaí, a tógadh í agus bhí a teaghlach sáite sa gceol. Bhuaigh sí go leor comórtas ar an gcláirseach agus rinne sí ceannródaíocht i bhforbairt na huirlise, go h-áirithe i réimsí an cheol rince agus cheol Uí Chearbhalláin. Go dtí sin, bhí an chláirseach in úsáid go príomha mar uirlis tionlacain nó chun foinn mhalla a sheinm.

"Táim im cheoltóir proifisiúnta le ós cionn 25 bliain ach caithfidh me a rá gurbh é Gradam Ceoil TG4 an onóir ba mhó im shaol nuair a bronnadh orm é. Baineann stádas ollmhór leis an nGradam, cruthaíonn sé poiblíocht ach thar aon rud eile is léiriú é go dtuigtear an luach cultúrtha a bhaineann leis an obair atá ar bun agat.

Cé gur bronnadh an gradam orm go pearsanta, bhí sé fíor-thábhachtach do chláirseoirí na tíre seo i gcoitinne mar gurbh í seo an chéad uair gur aithníodh luach na h-uirlise sa traidisiún Gaelach." Máire Ní Chathasaigh

Dúirt Derek Bell ó na Chieftains, nach maireann, gurb í Máire "an ceoltóir is spéisiúla agus is úrnua ar chláirseach na hÉireann lenár linn."